تفصیلات کے مطابق پشاور میں اپوزیشن اتحاد پاکستان ڈیموکریٹک موومنٹ کے جلسے سے خطاب کرتے ہوئے جمعیت علما اسلام (ف) کے سربراہ مولانا فضل الرحمان نے کہا کہ خیبر پختونخوا کے عوام نے ریفرنڈم کردیا اور سلیکٹڈ حکومت کو مسترد کردیا۔ دھاندلی ہوئی ہے، دھاندلی کرنے والا بھی معلوم ہے۔
مولانہ فضل الرحمان نے کہا کہ دھاندلی کرنے والے کہتے ہیں کہ ہمارا نام نہ لو، آپ سیاست کریں اور ہم نام بھی نہ لیں۔ آپ دھاندلی کریں تو وہ جرم نہیں لیکن ہم دھاندلی کے خلاف احتجاج کریں تو آپ خفا ہو جاتے ہیں۔ مولانا نے کہا کہ سلیکٹڈ حکومت کے خلاف اعلان جنگ کیا جاچکا ہے اور میدان جنگ سے پیچھے ہٹنا گناہ کبیرہ ہے۔
جمعیت علما اسلام (ف) کے سربراہ نے کہا کہ آج تک اس کا کسی سے واسطہ نہیں پڑا تھا لیکن اب اسے پتہ چلے گا، اس سلیکٹڈ حکومت کو ذلت و رسوائی کے ساتھ نکالنا ہے۔ انہوں نے کہا کہ آج ہم اس قابل نہیں کہ دنیا ہمارے ساتھ تعلقات قائم کرے، ناکام خارجہ پالیسی کی وجہ سے امریکہ، چین، ایران اور سعودی عرب ہم پر اعتماد کرنے کو تیار نہیں ہے۔
مذیدپڑھیں: پی ڈی ایم کے اجلاس میں 12 نکاتی ‘میثاق پاکستان’ پر اتفاق
مولانا فضل الرحمان نے کہا کہ امریکہ کی خوشنودی کیلئے چین کی 70 ارب ڈالر کی سرمایہ کاری کو تباہ کیا جا رہا ہے۔ انہوں نے کہا کہ ماضی میں بھارت کا وزیر اعظم پاکستان آیا اور پاکستان کو تسلیم کیا کیونکہ اس وقت پاکستان کی معیشت ترقی کر رہی تھی اور بھارت ہمارے ساتھ تجارت کرنا چاہتا تھا لیکن اب معیشت کو تباہ و برباد کر دیا گیا ہے۔ جس ملک کی معیشت کمزور ہو وہ ریاست بھی تباہ و برباد ہوجاتی ہے۔
